Samfélagslega ábyrgar fjárfestingar og siðferðileg viðmið
Um þessar mundir þurfa lífeyrissjóðir að mæta auknum kröfum sem til þeirra eru gerðar um samfélagslega ábyrgar fjárfestingar. Þá hefur verið bundin í lög skylda um að sjóðirnir setji sér siðferðileg viðmið í fjárfestingastefnu. Leiðandi evrópskir lífeyrissjóðir og stór alþjóðleg fjármálafyrirtæki hafa á síðustu misserum tekist á við áskoranir af þessu tagi með því að útiloka einstaka fjárfestingakosti og beina fjármumum sínum í auknum mæli í átt til samfélagslega ábyrgra fjárfestinga.
Í hádeginu fimmtudaginn 19. október flytur Kristján Guy Burgess fyrirlestur um nýjustu strauma, hvaða leiðir alþjóðlegir lífeyrissjóðir hafa farið, og hver þróunin hefur verið hjá helstu fyrirtækjum í eignastýringu. Hann mun einnig rekja nokkur dæmi um hvernig staðlar, vísitölur og mælikvarðar hafa tekið miklum framförum á stuttum tíma til að meta að fjárfestingarnar hafi raunverulega jákvæð áhrif á umhverfi og samfélag.
Kristján Guy Burgess starfar sem ráðgjafi fyrir eigið fyrirtæki sem hann stofnaði árið 2005 um verkefni á alþjóðavettvangi. Á árunum 2005-2009 vann hann með ráðamönnum og fyrirtækjum að verkefnum m.a. tengdri samfélagslegri ábyrgð, og leiddi saman ólíka aðila að umbótaverkefnum víða um heim. Hann var aðstoðarmaður utanríkisráðherra 2009-2013, starfaði hjá Atlantshafsbandalaginu um skeið og var framkvæmdastjóri Samfylkingarinnar frá 2015 fram í ársbyrjun 2017.
